مكتبة كلمات مصطقى سيد أحمد

17/ أملنا الباقي

أملنا الباقى يسرح بى
وأسافر لى زمن تانى
تبقى الدنيا فى عينى
هجعة خطوة .. فى سكة فرح مفقود
ورحلة موجة فى بحر الأسى .. الممدود
ورجعة غنوة من درب الضنى المهدود
وأفتش ليك
***
وأفتش ليك حنانى معاى
أمانى تصارع المكتوب
عشانك لا مسافة تطول
ولا بتصعب معاكى .. دروب
وقلبى عليك
وعلى الوعد الحزين .. مصلوب
وراجع ليك
***
وأفتش ليك
أجوب الدنيا .. وأرجع ليك
أجيك فارساً يشق صمت المتاهة .. الطال
يواعدك بى حكاوى الشوق
وبى شمساً .. وراها منال
وبى فرحاً يغرد .. فى سماك ألحان
ويجيب البهجة للأطفال

18/ وضاحة
الـصـبـاح الـبـاهـى لـونـك
وضـــاحة يـا فجــر المـشــارق ....
غـــابـة الأبـنـوس عـــيونك
يابنيّة مــــن خـــبــز الفنادق

*** *** ***

شـــيدتى فـى جــــوّاى صــوامــع لـى الـفــرح
وفـتـحــتـى فى دنياى .. مـسـارح لى المــــرح
وبــقيتى لى ســــكة وعــيون
لا قـدرت أطــولك شـــان أجــــيك
ولا قـــدرت من غــــيرك أكــــون
وأنا بــيــكــى مــالـينى الكـلام
... حــرّكت بيك عــصـــب السكون
جـــلــبت ليـك الغــــيم .. رحـــــط
طـــرّزت لـيــك النيـــل .. زفـــــاف
حرقت ليك الشوق بخور ...
وفرشت ليك الريد .. لحاف

*** *** ***

لا الســكة بيكى بتنتهى
ولا مـعــاك مــلّيت طـــــواف
ياريتنى لو أقــدر أطولك
وضّـــاحة يا فجـــــــر المشارق ....


19/ لحطة شهيق

نكر صوتك صداك غالطني الزمن فيك
شهرت على الجفاف وعدك بطاقاتنا
الخريفية رجع فاضي الكلام مليان معاك
أتبرجت غيمة وشهق جواي صوت جدول
مرقت على المطر حفيان لقيتك والرزاز
مدخل وناديتك أقيفى معاى نشيل كتف
الغنا الميّل ونتخيل حلم دونك بيتحقق
وقبلك خيل دماي واقفة على شرياني
تتشهد وبرد صوتك صداك غنيتي
رشحت حلقك لي إذاعات الشجر
والمنتظر من عودة المدعو المطر
للطنابير والمسادير واللسة في رحم
القصيد والدابو حسة وفى سوق عكاظ
بين مزازات الحروف غيرت رسمك
واحتكرتك للظروف للزمان اللي جائى
واللحظة اللي فاتت منك حسه
يا واقفة بين جرح السحاب وبين
شهقة الأرض البكر ما كان دريت
كان إحتمال تغيير قوانين حركاتك
مابين حديثنا ولحظة الفعل الحقيقي
وإنتباهك إنتى للشارع البيرحع
تانى لي نقطة بدايتو وإنحيازك
إنتى للشارع البيرشح في مسام
رمل التوقع ما إتعرف قانون نهايتو
غايتو أمشى بالدرب البطابق فيه
خطوك صوت حوافرك
يا فرس كل القبيلة تلجمو و يكسر
قناعاتو ويفر يسكن مع البدو في الخلا
ما يرضى غير الريح تجادلو وتقنعو
إفترضتك لون أساسي يمنح اللوحة
إزدواجية القراية ويفتح الضوء بين
خطوط الريشة والخط الإضافي
الجائى من شبكية الزول المشاهد
وإكتشفنا الرسمك وأنا وبرضو
التوارد في الخواطر
نفس أرقام التذاكر البيها
سافرنا وشهدنا إنفجارك
في الأرض يا سمراء يا واضحة
ما غنيت يوم جيتك صدفة
قبل أبداك كان غصنك بشر
يوم ما كان إحساسك مسا
عرّج الغيمة الفيني ومطّر
لحظة طار عصفور من صدرك
ردد فينا إحساس بالإلفة
ودوزن عصب الزمن الأشتر
وقلت المارق منك
داخل جرح الوردة وراسم فوقها غناوى الطل
المارق منك رجّع للغابات العرب العاربة
وللعتمور الزنج الهاربة وادّى الكون
مفتاح الحل المارق منك شادد عصب الورقة
وحرفي وراسم في اللاوعي سكون
مواعـيد صحوه وحلمو ونومو شارّى
يقينك في صمتي سارق لحظة إنى أفكر
المارق منك مارق منك أو مت شهيد
ما تضاري وراء الدعوات ما تتلبسي
الفرح الفات بسكن فيك النغم الزائف
ويسرق حاسة شوقنا الواقفة على
رجلين جواي ،نحن الهاوية والمتطامن
من الأرض آهـ من نحلك سـاعة يرحل
ولمن يكتب فينا الحنضل ويختم عمره بفعل الشهد
قال الجدول طلوع النخلة مرور الريح واحد
لكن الريح بيعانق حقل ونحن بنطلع نخلة
وننزل ونكتب في ذاكرة الصفق الأخضر
سجنا الريح في الورق الأبيض
وجهناها ضد التمر الناعس يسقط
فـى قبعة الحارس ذي الكان بيناتا ووارث
قالت غيمه بين قوسين غيمه لئيمة
أولاد الشارع فهرس لي كل المدن
التهرس جوفك بالأسمنت قالت ريح
شوف الناس قنديل لو ما نوّر يحرق
كوخ وباقي الحلة تنور أو جبة جوخ
أو ينزل بوخ يقول لي النسمة الزائفة أقيفى
لو تتفرد ريح تتشرد ريح ريح الخوف
لو تتفرد ريح تبـدأ تفرتق ضفاير المدن
النائمة تعيد تسريحتك
يوم سمايتك شكل قامتك كيف تموتي
وتحيى تانى ويوم قيامتك هو البيدينا الثبات
يا مجلوبة في قافلة رق ما بستحمل صدرك
رصاص الظلم يا صابت رحم الفال
يا قطعت حبل الود يا كنا نبيعك يا نسرق
اخترنا النار الضلها يحرق
ضللناك إنو الدنيا بيخشها ضوء يجرح
جلد العتمة لما الليل قربان فجرك
يا بت يا نيل لو نامت قمحة على الأبيض
تتشـرد زيو زاد الأبيض في غيه
مدد رجله اليسرى ماكان الكٍسرة
جاتك من بره صفرة ومنكسرة
زوجناك الشهداء أولاد الكلب
الماتو عشان الشعب زوجناك
ما عندك ضرة زوجناك ما جاتك ضرة
ما إنشاف ما عونك في الحلة يساسق ويلقى فتات
قال الأبيض للأزرق يبقى ضد الإنتباه
ضد تواريخ التمازج البيني بينك
للبشوفك في مراهفة الخرائط
فينا من وجع المسافرين واطه ما لاقت هوية
ردَّ الأزرق مطر الحبش لوكان نبش جواك سقف
وهدّ حيلك في الدواخل وشدّ عصبك في المداخل
صوت مراكبي وجيت بتسـأل فـي القمح
وفينا من فرح المسافرين قصة الشمس القضية
يا أعشاب النيل الأبيض ما تتضارى وراء الدعوات
أقرأ تاريخك وأقاوم وأسأل جبين الفجرألقى الفجر
مطعون في القـفا هل سافرت في ذنبك المحموم
حبة غضب ما شلنا جمرك وإنطفا جوانا نارك والمطر
جائين بي الكتابة وضربة النـاس المهابة
لو هزّ نخلك بـاشبزق ما فارق النخـل السبيط
ما سـاور الطـورية شـك إنو الأرض أنثى
وبتحمل بي الحـلال مين اللي قال إنو المسافة
البينا وبين الشمس طاقـة أو ميـاه النيل
بتدخل فـي عـروق السنبلة المسقـية بي
عرق الجعانين والمسافـرين بالبطــاقة
أقرا تاريخك وأقيف جواك والزمن النضيف
جـواي مـن جواك غضب سلم مفاتيح
الســؤال جيل الشمس موكب حريـق
واقف على باب الدخول بيناتو بينات الوصول لحظة شهيق


20/ يقول غنوات

بقول غنوات محمد طه القدال


بقول غنوات .. واقول غنوات
فى البلد البسير جنياتها لى قدام ..
بقول غنوات
وفى الولد البتل ضرعاتو فى العرضة
ويطير فى الدارة صقرية ..
ولو السمحة تلت إيد
ومدت جيد يقوم شايلاه هاشمية
يشيل شبالو وختفة ريد وفرحة عيد ..
وريدة روح وحمرة عين وإيدية
بقول غنوات .. بقول غنوات
وفى الولد البشيل مدقاقو قولة خير على القمرة
يقابل الجاية متحزم ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
و قبال حول تغيم غيمة قبلية
ترش الدارة والحدبة الصعيد الحلة
يا فرحه بتطارد الصفقة فى النسمة الصعيدية
وياجهرة نهار الليلة بدرية
رحيح جنياتنا فى
الحدبة الصعيد الحلة
يا قمحاتنا هو لبلب ...
يا سمحاتنا هو لبلب
و يا اللوز الفتق فى الوادى هو لبلب
ويا البحر الطمح مدادى هو لبلب ..
ويا حجواتنا يا دعواتنا هو لبلب
سألتك بالذى ركز الأرض معبد
وسوى الناس عليها مقام
سألتك بى حجا الأمات ودعواتنا ..
سألتك بى كبيداتن و دمعاتنا
شليل وين راح ..
يكون ضل الخريف فاتنا
وشليل وين راح
وزى برق السماك الجابها دغشية
وزى زغرودة البطن الكبارية
مرق من شامة القمرة
مهيقت بى وداعة الله
ومقدم بالعديل يبرا
تعالوا ابشروا ياجنيات
شليل ما راح .. شليل ما فات
شليل عند المسورو حرق بقالو حصاد
شليل فوق التقانت قام خدار وبلاد
شليل مشوار.. شليل مسدار
شليلنا أرضنا يا جنيات
شليل قائم نصاصي الليل
يتمتم ليلو وردية
حرازنا شليل .. شليلنا دليب
شليلنا دليل على البلدات بعد درب التبلدية
شليل ما راح .. شليل ما فات
مزارع بات على عشقين
تراب بلدو
وسماح فوق بت
مزارعية

21/ بين الموجة والخزان

سنّى على النضال إيدى
سوّكى بى الهتاف .. فمّى
شوارعك لى .. دويها .. على
إذا ما آخر العلاج الكى ...
مراويدك حُمر يا أمْى

* ** ***

هردت لهاتى بى الغنوات
وقتْ يبرد حشاك .. يا أمّى
من التعب البلا صالح ...
تفيقى .. تروقى .. تنجمّى
تسوّى مكانسك المطرة
تضوى البيت وتنجمّى
تمرقى صبوحة لى الجيران
قدح فوق إيد ... (وفْيد) ألمى

* ** ***

يلاقوك شفّع الكتـّاب
نضاف وظراف بلا النسمى
يغنولك غناوى السـاب
وفى بيوضة مافى سراب
جبال كجمى وفيافى الكاب
تميد بى الخضرة ...منقسمى
فيافى الصّى وبيوضة ..
البراسيم فيها مفروضة
خدارا يرارى شوف عينى
على الأبواب .. طواريها وحواريها
بقت روضة
بقت تشرب من الحامداب ..
تشوفى رهاب ... بُعُد نجمى
بشوفو قريب قُرُب نضمى
بشوف العالم التحتانى هيلاهوب وقف ناهض
وهدّ عمايد الفوقانى ..
جوّة الجُب رمى العارض
وفى الساقوا الدمار أفراد
عريق الحب نبض قابض
متل قبض الحروف فى إسمى
وغناوينا القبيل .. رقراق
علينا تصب برد .. قارض
وأجر نمّى ...
أدوبى لهاتى بى الغنوات ..
عُقُب يبرد حشاك .. يا أمّى

* ** ***

وطنى ولا ملى بطنى
سكاتى ولا الكلام النّى
بليلتى ولا ضبايح طى
قليلتى ولا كُتُرْ سمّى
سلام يا أمّى
سلام لا هكمى .. لا دكْمى

22/ عزة هوانا

ياجرح عزة هوانا
الساكنة فى حرف الكتابة
أصلو فى .. زمان الأسى المشدود
.. على وتر الكآبة
فى زمان الحرقة .. والخوف ..والرتابة
إنكتم نبض الأغانى
وإنبهم حس المعانى
وإنجرح خاطر المهابة
جيتنى فى الزمن الأليم
قلبى مثخن بى جراحات الهوى
عمرى ضايع فى متاهات النعيم
فى دروب الغربة .. لا تاب .. لا قِوى
كان عيونك فيهن الوصف القديم
معنى فى الحب .. إنطوى
وضاع معاك زمن الوسامة
وإختفى الفرح العلامة
لسة يا حزن الملامة
من سنين دربك .. سلامة

23/ يا خطوتك

لا زمان حبك حقيقة
لا تعب زمنك .. فرح
يا خطوتك
يا خطوة الوجع .. الجرِح
لا الفيها منك إبتدا
لا البيها منك إنتها
يا خطوة ضاعت بين صراخك .. والصدى
بين المشاوير والنوى
بينك وبين كل المشاعر
الفينا غرقت فى الغنا
***
يا خطوتك داست على الحرف اليِبِس فوق الشفاه***
داست على البوح .. والكلام
داست عليك .. وعلى إنتظارك والملام
داست عليك
وعلى الدروب الجاية منك .. وماشة ليك
لا تِعِب فيها الحرف
لا فتر فيها الوِلِف
يا خطوتك
بين إبتعادك .. وإنتظارى
بين مشاوير طفلة ضاعت
بين عيونك .. وإفتكارى


24/ يا بكره
مساماتك بتشقق عشان تشرق صباحاتك
صباحاتك بتتعانق مع الفكرة
وتاخد من جراحاتك
نضيف إحساسنا بى بكرة

***
يا بكرة الغصن ناشف
ويا بكرة الفرح يوماتى ..
بيكاتل حزن أطفال
بتتشابى عشان تعرف .. شنو الفى إيدنا لى بكرة
شنو الداخرنـّوا لى الكسرة
عشان تشرق صباحاتك
عشان تقصر مسافاتك
عشان تبرق غماماتك
عشان تخضر مساحاتك
عشان بكرة
وبعد بكرة

25 / إسلاب

خبرينى والمساء الشاحب الخطوات يحترف التعب
ورحيل أغنيةٍ توشوشُ فى خبايا الإنتظار
تضيع منى
كى تجاذب كل أطراف الزمان
أهدهد الكلمات
لا أقوى على شىءٍ من الذكرى
وهذا العقلُ متعب

رجوعُ الدرب .. لا يفضى إليك
ولا إلى اللغةِ الصريحة
كى أحدد ما تبقى من رحيقك
فى مسام الروح .. والجسد إشتعالاً
وهذا النبض .. أتعب

وتلك الخطوة إبتعدت عن الصحو
المكمِّل للحقيقة
أغلقت بالخبث أبواب الوضوح
زيفت صوت المغنى
عهرت لغة النشيد
ضيعت حلم الصبايا .. فى طوابير الرغيف
غيبت حلم الطفولة
أنهكت حزن الشيوخ
همشت منك .. القضايا
فى إحتمالك للتواصل
والمرابون إستباحوا هذه الأرض الحلوب

فيا جميلة .. خبرينى
كيف بددنا الكذوب
ثم إنّا لم نعد ندرى بأنا
مذ حملناكِ .. جنينا
قد نسينا أن نضع فيه الملامح
لو سـُئلنا كيف ضيعنا إنبهارك بالخصوبة
وأرتضينا أن نسلم للعساكر
من ثمارك ما يطيب

26- ضوء شبيابيك البيوت
يا ضوء شبابيك البيوت
بين التوهج .. و الخفوت
أسرح معاك .. و اسألك
قبال ما يخنقنا الرماد ... و يعلم العقل الحياد
قبّـال لهب حلمك يفوت
و جذوتك تبهت ... تموت

يا ضوء شبابيك البيوت
أسرح معاك .. أستفسرك
عن ظلمة تمتد و تطول
وإتلخبطت فيها الفصول
عن كلمة ضاعت في الفراغ
بين البزيـِّف و البقول
عن سر يباس البذرة .. في طين الحقول
عن كل أحلامي ... الصغار
الما لقت ... غير الذبول

26 / غابات الخليل

بالأمس ،، كان غناؤنا عذبآ
و كنت تتخذين قافيةً
لها طعم التواصلِ ،، و التبادلِ بين قمحٍ و خصوبة
فلماذا تأخذين الآن شكلاً يرتدي لغة الظهيرة
يقتفي ظل الفجيعةِ
تختفي منه العذوبة؟
إنها اللغة التي عمقت فينا التداعي
و غلغلت بين العظامِ
تزامن الوجعِ المعبأ بالضياعِ ،،، و بالرطوبة
فأخترنا من بين الزحام
خرائط الفرح الملون
بالطبول العازفات مقاطعآ تنمو علي عين الحبيبة
بادرتني هواجسي
فأستعرت من الشوارعِ عظمةً كانت تحدقُ في الحياةِ
و تعتريها الأمنياتْ
و سمعتُ من مدنِ الخرابِ حكاية الآتين منك
يلعقون السمّ
من شفةٍ تدندنُ بالرخيصِ من التباكي ،، التشاكي ،، الأغنياتْ
فيا بنتُ المسافةِ والرجوعْ
و يا بنتُ الخريطةِ و الدموعْ
إذهبي مني ،، تمنِّي
و أمنحي القلب التجلِّي
و غادري اللغة التي ظلت تموتْ
أغرزي فيّ الثباتْ
الله يا وجعآ تمدد في العشيةِ ،، و الصباحْ
الله يا حلمآ تناثر بين افواهِ الرياحْ
و يا طفلةً ظلت تفتشُ عن ضفيرتها
تحدقُ في حطامِ الأمسياتْ
سافري سافري سافري
سافري فيّّ ،، شموسآ و وتر
عمقي جرحي اقترابآ و سفرْ
لأغنيكِ التماسك
أبتغي منكِ الوصول
أمنحي القمح الخصوبة
أمنحيني نفسي ،، دون خوفٍ ،، دون همس
وأمنحي المدن الدليل
فيا طفلةً ظلت تفتشُ عن ضفيرتها
بين دمعٍ ،، و رحيلْ
هل يكون الموت نوعآ من تآلف
في غياباتِ الخليلْ ؟

27/ السحاب
السحاب لو اصلو خاصمنا ... و تعب
و الرياح الفي الدرب
شتّتتْ فرح القوافي
و مّددت حزن المنافي
برضو ريدك فينا باقي
في الحنايا ...في عيون أطفال بتكتب بالدوايا
في المشاوير والحكايا
و جّوه ثابت في القلب

***

يا سمحه ما غابت مدينة
يا سمحه ما بموت الفريق
و لابينهش في غناوينا الحريق
و الوتر دايماً بغني ..
للقوافل الجايه من وجع الطريق

***

و السحاب برضو بيعود
ويجيك بي برق البشارة
بينا بينك لا موانع لا سدود
بيناتنا بس تبقي الجسارة

28/ شوق الشوق
شوك الشوق لى الشوف آ خَىْ
ضارب فِطن النسج الحى
يا منقاش أحزانى إنشرت
وادى الفرح إتمدد صَى
يا راحلين ــ عِـنْ ــ دُغُش الليل
ما لاقيتو جناياً زى ..
تكية نخل الفجُر الجاسِر
فوق فى المتَرَة .. عَرَاجِنْ ضَى
آ رعاوة .. العرب الرُّحّل
ما لاقاكُنْ فى المطرانى ؟
فى كاويقْ الجرف الأمحل
بين أسراب الرهو الراحِل
ساند أكتاف الليل الميّل
عِنْ ساساق الغيمة عليكُن
بين رقراق الخيمة معاكُن
ما أديتوهو شِوَىْ ... بى حرجل؟
آ رطّانة الليلُن ليّل
ما لاقاكُن فى ونساتكُن؟
بين الشادِى وبين كاساتكُن
فى صلواتكن .. عِنْ دعواتكن
أو .. دقساتكُن عِز خلواتكُن
زول .. زول الله
إن مِحِن .. آ .. بِسأل
الهبّاد لى غُلبْ أخواتو
الفرّاح عوّان الحلّىِ
الفدّاع لى الليل ظُلماتو
آ نجمات .. شقيش قولن لى
ما لاقاك طالِع .. متدلّى ؟
المطيوب من طيبة أُمّاتو
كالفجّاج .. الندّ نباتو
موج البحر اللّحَمَر هوجتو
وعِرق العِرِق .. اللاّوى ثباتو
جانا الشَدر الأخَدَر منو
ونار الشدر الأخَدَر جاتو
فات شِقيش ...
أب قولاً واحِد ..
وليش ما يرجع من غُرباتو
طوّل طُول .. ما طلّ علينا
وقاطِع مِننا جواباتو
الغابات جات تنشِد منو
والعربان راجين جياتو
أديناهم عرقو .. وعَلَقو
صورتو يقلِّب فى كِتْباتو
ضُل رشاشو .. ركيزة زولو
ساعة سِلمو .. ويوم حوباتو
سِن طوريتو ولون أبرولو
حِس طنبورو البى نغماتو
لهْلَب عِشق الناس الفقرا
وبرّد جوفُن .. بى غنواتو
ويا غنواتو
الدخلت فينا
تمرق .. جينا على جِلاّتو
وجِيداً جينا .. طلقنا وشينا
وش الدنيا الليلة حلاتو
وش أطفالنا الليلة حلاتو
وغنى معانا غنانا هويتو
غنِّى العالم
غنى حياتو
لا ساومنا عليها قضيتو
ولا فكينا من إيدنا .. وَصَاتُو
ألف شليل يا نورة يفوتو
عشان ما يجيك شليلك زاتو



29 / مطر عز الحريق
من الواسوق أبت تطلع
من الأبرول أبت تطلع
من الأقلام أبت تطلع
من المدفع طلع خازوق
خوازيق البلد زادت
يفيض النيل .. نحيض نحن
يظل حال البلد .. واقف
تقع محنة
ولا النيل القديم ياهو ... ولا يانا
نعاين فى الجروف تِنهد .. ولا يانا
رُقاب تمر الجدود تِنقَص .. ولا يانا
متين إيد الغُبُش تتمد
ولا قِدّام
تتِشْ عين الضلام بى الضو
تفرهِد شتلة لا هدّام
ولا فيضاً يفوت الحَد
عُقُب يا نيل تكون ياكا
ونكون أهل البلد بى الجد
يا مطر عِز الحريق
يا مصابيح الطريق
يا المراكبيى البتجبِد .. من فك الموج الغريق
جينا ليك والشوق دفرنا
يا نشوق روحنا ودمَرنا
يا المحطات الحنينى القصّرت مشوار سفرنا
ياما شايلك بينى حايم
لا الليالى المخمليى
لا العمارات السوامق .. لا الأسامى الأجنبيى
تمحى من عينى ملامحِك
وإنتى جايى المغربية
دايشى .. داقسى .. المغربيى
وشِّك المكبوت .. مكندك
سمسونايتك زمزميى
كون شِبِر .. طوريى .. مُنجَل
سِبحِى .. فانوساً مدردح
قلتى بيهن لى زمانِك
يا زمان الحاجى عِندك
يا زمان الآهة حدّك
لا تَطَى الوردة الصبيى

30 / الشوق من حاطفْ .. لا .. قاطفْ
الشوق من حاطفْ .. لا .. قاطفْ
إتلمَّ يهز ليك .. يا نوراى
يادرقة وسيف
يا حضناً .. كيف
من شر الصيف والشتا .. ضاراى
يا شعلة عِـز .. بقـّت جوّاى
عدّت بى ضلام بحراً عاصف

***

يا بت العرب النوبية
يا بت النوبة العربية
بى فردة نخوة .. بجاوية
أو شدر الصحوة .. الزنجية
دسينى من الزمن الفارغ
من ريح المتعة .. الوقتية
من شر الساحق والماحق
بين دبشْ المدن .. المدعيـّة
والليل إتحكـّر بيناتا
كحـّل بى دبشو عويناتا
يا شمس الناس .. المنسية

31 / نورة

وكتين يضيع عرق الجباه الشُّم

شمار فى مرقة .. آه .. يا نورة آه

من دربك التوّر نفس خيل الصبر

فتـّر خطاوى الشوق وراه .. يانورة .. آه

ساعة الشموس الغُر تهضلم

تلحق الصِّح .. فى المغارب

يستر الضو الكهارب

تستر المدن السرابية .. الضبابية الكآبة

حائط التيه .. والطشاشات .. فوق قفيِّك

يا أمْ عوارض...

يا أمْ عوارض .. ما دُعاشة

ماها شبـُّورة وتقيف .. جايى ليك يا نورة غيمة

تملا ماعونِك خريف

يملا عينيكى ويفضـِّل

يروى جوّاك العطاشا

***

يا نفس فجر القصايد يا بلادى

القطع قلب الروادى .. بى اللّواج الجاى .. وغادى

ماهو صوتك .. لاها صورتك

دى البترقش نادى فوق صدر الجرايد

إنتى يا حُضن الصحارى

شُفّع العرب الفتارى

البفنـّوا الشايلا إيدمْ

ويجروا كايسين القطارى

لا سراب الصحرا .. موية

ولا حُجار سلّوم .. موائد

حالكم البصرخ وينادى

ياوطن عز الشدائد

***

يا هُدى الناس الحيارى

يا ندى الفجر الببلِّل نور عِوينات الفقارى

جايى ليك يا نورة

آفة .. للسوس البنقـِّر

عود عِشيماً داخرو فيك

أصلى لمـّن أدور أجيك .. بجيك

لا بتعجّزنى المسافة

ولا بقيف بيناتنا عارض

لا الظروف تمسك فى إيدى

ولا من الأيام .. مخافة

يا نفس فجر القصايد

ما ضِهِبْ فى بعدى عنـِّك

أصلى متغرِّب عشانك

راضى بى الجايينى .. منـِّك

ما شكيت شُح اليالى .. وما بكيت نُحْ .. شِلتوا حالى

رغم إنو الحال بيفضح

إلاّ كٌتْ فى الحارة بصرُخ:

يا وطن عِز الشدايد

32/ طيبة

كل ما تباعد بينا عوارض

كل ما هواك يا طيبة مكنِّى

تلد الغربة .. الكُربة الواحِد

بيكى أسمى الشوق .. وأكنـِّى


*** *** ***

لمـّا أفوتك من دون خاطر

أو دون خاطر منى تفوتى

بلقى حبايب فى كل حِتـّة

وكل بيوت الفُقرا .. بيوتى

لا غيرت وراك الجِتـّة .. لا بدلت ملامح صوتى

لا غافلنى وهادن فنى .. غام لى المدن .. الما عِرفتنى

إبن الشوق الصبرو .. مصوبر

للأرياف الكم .. وفّتنى

وللأطفال الناشفة ضلوعا .. ونازفة بغنى

أطمن روعا .. وأهتـّى دموعا

ببسمة بكرة اللاّها تمنى .. ولا مصنوعة


*** *** ***

أغنى لشعبى ومين يمنعنى

أغنى لقلبى .. إذا لوّعنى

مخيـّر دربى الما رجعنى

إذا طلعنى نخلة القرب .. أو الغربة الكدروبية

تنزل غنوتى بى قمرية

أو وقـّعنى فى بطن الجـُّبْ

بطلع يوسف بالأغنية

أغنى الناس الما بتسمعنى

المِنِّى بعيدة .. ومبعدة عنى

النادا نشيدا .. وكنت المعنى

الإيدى فى إيدا .. وإيدا بتبنى

فى دنيا جديدة اليوم .. راح تدنى

وأريت غنواتى فى ناس شغالة

تكون سُندالة .. وعود طورية

ضراع رجالة .. كتاب أطفالا

وجملة بالا .. الما مكرية

سدّة مالا .. وبقـّة فالا

فى ليلة الدخلة على أسمى قضية


*** *** ***

حبيبة قلبى يا سودانية

يا أسمى معانى فى زول بيعانى

ياود ضكران .. ويابتْ دغرية

وأنا إنْ سامعانى فضـّلت أغانى غُـبش .. فقرية

وروح غانيانى

حويتك منك يادافعانى براحة إيديا

ويا جابدانى ... برفق عليا

وما بتحيـّر بين الفوق .. وبين الناس التحتانية

إلاّ مغـيـّر .. ولاّ عقُوق .. ولاّ كفيف الإنسانية

ومنـِّك وين يا كاشفة عينيا

بنور الإلفة .. ضِيا الحنية

وحِلم العالم .. ناس تتسالم

والبنى آدم صافى النية

والأطفال الناشفة ضلوعا

يطمِّن روعا

وتبدى تغنى

غناوى البكرة .. الكم مسموعة

حسيس طنبارة .. مع نـُقارة

صفِقتاً حارة .. ودارة تغنى

فيا حلتنا عليكى تـُرابك ..

وإنتى شبابك زينة الجَنـِّى

أحلى عروس البلد اللّتنا

ولاّ الغُبُش الرّابّة تهنى

ولاّ هدير المدن التصحا ..

وتمحى ظلام الحاصل .. عنـّى

34 / كتبت ليك
كتبت ليك

لا بينى بينك ريدة .. لا قصة غرام

إخترت ليك

أجمل حروف .. وأصدق فواصل نادرة

فى لغة الكلام

لا قصدى ألهو معاكى بى كلمات غنا

لا شعرى ليك مرجيحة من شعر الغمام

كتبت ليك والله يا قمر الزمان

شان جيتى بى زمن المحنة

وشفت فى عينيكى .. حس أهلى القُدام

* * *

كتبت ليك وأنا جايى من زمن الشقا

الممدود على وش الثوانى .. مظللا

تتمدد الساعات سنين

تتفتح الأحزان غريبة .. ومذهلة

وأشتاق أفتش نسمة .. فى الزمن العذاب

وأيامى من كتر الأسى

وكتر العزوف .. والإغتراب

صارت حروف مترهلة

لحظات أسيفة .. ومهملة

* * *

كتبت ليك

ووقفت ليك .. لامن لقيتك جايه من قلب الطريق

ولمحت فيك راحة المشاوير البعيدة

ونفحة النسمة الحنينة

الجاية من قلب الطريق

حسيت عجايب الدنيا .. إتلمـّت .. بقت

جايـّانى من عصراً سحيق

عينيكى حس أطفال بنادوا القمرة لى الغايب .. يعود

وجبينك الضوّاى

حجا الحبـّوبة فى الزمن السعيد

* * *

وأنا فى قساوة الموحش

الزمن المكهرب .. بى الحريق

أنا حيلتى أيه

قوليلى يا قمر الزمان

غير أتـّكى .. وأحلم معاك

وأحضن أماسى الصحو ..

والأمل البريق

35 / المسافة

لسـّة بيناتنا المسافة .. والعيون

واللهفة والخوف .. والسكوت

ورنة الحزن البخافا

تعدّى بى الفرحة ... وتفوت

وأمشى بى الحسرة .. وأموت

***

الأمانى الفى سفر

قبل الزمن .. كايسة الموانى

يوم تجيبنى عليك .. بصدّق

إنو مرة الحظ طرانى

وإحتوانى معاك شجن .. عذبنى قبلك

ولسـّة منك .. جايى تانى

تمشى وين الخطوة عنك

ما الزمن بى الحب بلاكا .. وإبتلانى

***

لى عيونك يا مداين الفرحة والحب .. والجسارة

عندى ليك مليون بشارة

وألف خير ... والكلمة شارة

وإنتى لمـّا الحب يهـوّم بى عيونى

وفى عيونك بى قى حائر .. بالأمارة

الفرح منك .. يجينى

يعترينى الخوف عليك

خطوة منك .. خطوة ليك

راجى منك بس إشارة

وكلمة تدينى البشارة

ولاّ بيناتنا المسافة ؟

36/ الشجن الأليم
عارفنى منك

لا المسافة ولا الخيال يشغلنى منك

عارفنى

***

ببقى بعدك فى الأسى

وتبقى إنت الظالم .. القاسى .. النـِّسى

وغصب عنى أشيل ظنونى

وأقول عليك .. إنت المسامح

فوق شجونى

أعيش زمان بالفرقة جارح

وفى إحتمالى وبالى إنـّكْ

إنت سايق فينى ظنك

***

تحرمنى منك

والمواعيد لا بتشيل منـّك .. تودِّى

لا الشجن قادر قادر يسوقنى عليك

أعدِّى

لا التحايا ولا المشاعر الحيـّة

فى عمق الحنايا

لا رسالة تجينى منـّك

لا خبر طمنـِّى عنك

وإنت سايق فينى ظنك

رغم إنك .. إنت عارف

إنـّو منك .. لا الزمن يقدر يحول قلبى عنك

لا المسافة ولا الخيال يشغلنى منك

***

يا هوى الألم النعيم

خليك على الوعد القديم

وخلينى فى الشجن الأليم

وأبقى فى كل المداين

سكتى .. وسفرى الجحيم

تبقى أيه الدني من بعدك .. تكون

وأبقى أيه بعدك .. أكون؟

عارفنى منك ...

37 / لوجة وطن في عيون طفلة

لوحة وطن فى عيون طفلة
طفلة حلوة وشايلة لونة ..
ترسم الوطن الشباب
كل خط فى اللوحة باين ..
من دموع الطفلة يحكى
النفوس تبقى السحاب
القلوب تبقى الأراضى ..
نزرع الوطن اليباب
راسمة فى اللوحة القمارى ..
فيها وش النيل حزين
الضفاف كان لونا أحمر .
الشجر كان لونو أخضر
الجباه عرقة بيضارى ..
حمرة النيل واصفرارو

***

راسمة جوه اللوحة طفلة ..
الفرح فى رموشة صفق
ادت الامواج بسيمة
غير النيل إنحدارو
لابسة من السعدة قرقاب .
شايلة فى الأيد الطوارى
مارقة قمحة من اليباب

***

شلة من أطفال مدارس .. فى نظام ماشين سوا
رددوا الخير بالوتر
الزمن فى اللوحة بشر
الجروف فتحت مداها
الغيوم شايلة المطر
الترابلة هناك كبار
شتتوا العيش للمواسم
العيون شايلات بطر
من بعيد فى اللوحة عامل
الآيادى على السنابل
ودع الليل والفتر ..
خدرالوطن اليباب


38 / ابداكي من وين

ابداكى من وين..
وفينى منك لسة حاجات
من مخاوف ومن شجن
أبداك من وين وظنى إنك
فكرة إعلان الحيـاة
وانتهاءات العوارض والمحن
نفسى ألقاكى وأكون
انا كلى من بعضك
أو بعضى من كلك بدن
داير ألقاك وأوحد دايرة الدم
المقسمة بينى بينك والشجن
أبداك من وين
ابداكى منى ..
ولا منك أبتديك محل محل
من ياتو منفذ بدخلك
كل الدروب الفيكى سداها المحل
من ياتو شارع بوصلك
كل الدروب معطونة لآخر الوحل
بستبيح كل المنافذ وادخلك
من بين كلامك بدخلك
من ابتسامك بدخلك
من بين مسامك بدخلك
من أى قاسم مشترك
أو شبه التشابه بدخلك
نتلاقى نهرين من تسامى وإشتهاء
أبداك من حيث انتهت
عندك خواطر الإنتهاء
أبداك من وين

39/ من جديد
من جديد جيت تانى تكسر
صمتى .. بالنظرة الخجولة
يا أمل عمرى القبيل ..
ويا سنين عامرات فصولة
ما قدرت أنساك من زمان
بس ضاعت أحلام الطفولة
***
الحنين الجيتنى بيهو
جانى فى لحظات ندم
فى زمان ضيع صبانا
وكل اشتات العشم
من جديد جيت تانى كيف
تبنى فينى الإنهدم
وما قدرت أنساك من زمان
بس ضاعت أحلام الطفولة
***
ما بفيد انا لو ألملم
من عيونك .. ذكريات
أو أصحى الماضى فيهن
وأنسى حزن الأمسيات
برضو زمن البهجة عدّى
وعمرى فات فيهو الفوات
ما قدرت انساك من زمان
بس ضاعت احلام الطفولة

40/ مريم الأخرى
هاهى الأرض تغطت بالتعب
البحار إتخذت شكل الفراغ
وأنا مقياس رسم للتواصل .. والرحيل
وأنا الآن الترقب .. وإنتظار المستحيل
أنجبتنى مريم الأخرى قطاراً وحقيبة
أرضعتنى مريم الأخرى قوافى
ثم أهدتنى المنافى
هكذا قد خبرونى .. ثم قالوا لى ترجـّل
***
ثم أنتِ .. أنت ياكل المحاور .. والدوائر
يا حكايات الصبا
تحفظين السر .. والمجد الذى مابين نهديك .. إختبا
ليس يعنيك الذى قد ضاع من عمرى هباء
وأنا .. يا صغيرتى .. لست أدرى ما الذى يدفعنى دفعاً .. إليك
ما الذى يجعلنى أبدو حزيناً
حين أرتاد التسكع .. فى مرايا وجنتيك
لا عليك
فعلي هذه السفوح .. المطمئنة
نحن قاتلنا سنيناً .. وأقتتلنا
نحن سجلنا التآلف .. فى إنفعالات الأجنة
وأحتوانا البحر .. والمد اليقاوم .. والشراع
يا هذه البنت التى
تمتد فى دنيايا سهلاً .. وربوعاً .. وبقاع
ما الذى قد صبّ فى عينيك شيئاً من تراجيديا الصراع
***
والمدى يمتد وجداً عابراً هذى المدينة
خبرينى هل أنا أبدو حزينا
هل أنا القاتل .. والمقتول حيناً .. والرهينة
هل أنا البحر الذى لا يأمن الآن السفينة ؟
خبئينى بين جدران المسام
قبلينى مرةً فى كل عام
فأنا أحتاج أن ألقاكِ فى كل عام
أنا أحتاج أن ألقاكِ فى ذرات جسمى
فى الشرايين المليئة بإنقلابات المزاج
فى إنعكاس الضوء
فى النافذة الأولى .. وبلـّور الزجاج
.. هكذا قد خبرونى .. ثم قالوا لى ترجل
***
وعلى أطروحة الحلم المسافر .. ألتقيك
على حمى الرحيل المستمر .. الآن .. فى كل المواطن ألتقيك
فى مساحات التوهج .. فى جبينى .. ألتقيك
فى إنشطار الوقت .. فى كل الذرى
وفى حكايات الطفولة .. إذ يعود بنا الزمان .. القهقرى
آه لو تأتين يا سيدتى .. من كل فجٍ .. وأتجاه
من عميق الموج من صلب المياه
تستطيعين التنقل بين أرجائى وظلى
تستطيعين التوهج .. عند لحظات التجلى
ولعينيك إمتلاك وثائقى .. حتماً .. وقلبى
ولعينيك التنصل .. عن مواثيقى ودربى
هكذا قد خبرونى .. ثم قالوا لى ترجل
***
وأنا أبحث عن صيغة هذا البعد .. هذا اللاّ نهائى
عن قرار الشعر .. عن لون التـّغرُّب
بين جدران المقاهى
آه لو تأتين ... آهِ
تجدين الإِلف الممتد سهولاً .. بإنتظارك
وأنا .. كالحذر المنساب .. خوفاً
بين صالات الجمارك
كالرحيل .. كالترقب .. وإنتظار المستحيل
هكذا قد خبرونى
ثم قالوا لى ترجل

41/ اظنك عرفتي

أظنك عرفتى

عواصفك مهبـّى

أبارى فى خيالك

يسوقنى ويودّى

ونهرك يعدى ويجهل مصبّى

هواجسى البتزرع وظنـّى البربى

***

لقيتك خواطر بتصحى وتساور

وطيفك يزاور وروحك تحاور

تجيبنى فى زمانك موشـّح أساور

أقول بس نسيتك وجرحك يناوِر

***

أظنك عرفتى عذاب المغنى

وطبلو المجدّع شظايا التمنى

حروفو البتجزع فى لحظة تجنى

خطاهو البتهرع متين تطمئنى

***

يسرِّج خيالك حصانى القبيل

معربد غبارو وخلّى الصهيل

مسافر .. مسافر وفاقِد دليل

أظنـِّك عرفتى .. هموم الرحيل

42/ أخر شعاع
الليلة مات اخر شعاع
شفناهو من نور الامل
وقفت فى نص الطريق
والليل خلاص سترو انسدل
وصفير رياح وعبير جراح
واشباح تقول لى ما بتصل
كيفن تصل وسط الضياع
حتى الشعاع منك افل
كيفن تصل والليل طويل
وعليك تقيل زى الجبل
وسحابة حجبت النجوم
وكست ظلام كل القبل
***
فى اللحظة ديك شفت الضياع
واللوعة فى القدر النزل
وشعرت بى موج الوجع
قلبى انصدع دمعى انبهل
شفت الخيال لوح بعيد
عبر الظلام صاح فى وجل
قال الوداع قال الضياع
كيف الوداع بعد الحصل

43/ غدار دموعك

لا تنبش الماضى البعيد الم تكن
يوما لقلبى واقعا مجهـــولا
لا تنكأ الجرح القديم فإننى
و دعت ليلا مظلما و ثقيلا
وحملت روحى فى فواد نازف
ما زال يحمل نصفه مشلولا
وخلعت اثواب الحداد اما كفى
اذ صار قلبك فى الهوى ضليلا

__.__.__

غدار دموعك ما تفيد
فى زول حواسو اتحجرت
جرب معاك كل السبل
وايديهو ليك ما قصرت
حطمت فى قلبو الامل
كل الامانى الخدرت
كلماتو ليك ضاعت عبس
لا قدمت .. لا اخرت

__.__.__

ما كنا وكت الليل يضيع
تشرق نجومو وتنكتم
ويطل شعاع يكشف قناع
والظلمة ترحل تنهزم
وجفونا من طول السهر
تلبس وشاح فرقة والم
نستبشر اليوم الجديد
ونقول تعود انت العشم

__.__.__

كيف العشم وكتين يموت
والغصة تطعن فى الحلق
كيف الحنين وكتين يهز
لى زول بعيد ما بتلحق
كيف الرجوع لىزول قنع
شايل رماد(رفاة) قلبـو الحرق
سيب الندم وانسى الدموع
ما فات زمان ما بتلحق

---------------

غدار دموعك ما بتفيد
فى ظلمة ما بتعرف شعاع
اشباحة زى موج العدم
كسر المقاديف والقلاع
ونزلنا فى طوف الفشل
وابحرنا فى بحر الضياع
ونسينا ذكراك الزمان
عشناها فى زيف القناع


44/ مسامتك

مساماتك بتتشقق عشان تشرق صباحاتك

صباحاتك بتتعانق مع الفكرة

وتأخد من جراحاتك

تضيف أحساسنا بى بكره ..

ويا بكرة ..

ويا بكرة الغصن ناشف

و يا بكرة الفرح يوماتى بيكاتل حزن أطفال بتتشابا

عشان تعرف شنو الفى أيدينا لى بكرة

شنو الداخرنو للسكة

عشان تقصر مسافاتك

عشان تيرق غماماتك

عشان تخضر مساحاتك

عشان بكرة وبعد بكرة

عشان بكرة وبعد بكرة


45- الزمن الفلاني


لمن يجى الزمن الفلانى

سمانا بتقطر مطر درى وتمازج برتقانى

نسطر اسمك يا حبيبنا

برموش غيم ارجوانى

ندمن الضحك المعافى

ونحيا الفرح المورد ياسمينى واقحوانى


يا حبيبنا جوه عينيك عايش أنا

بنسج الأيام أغانى

والطريق ما ببقى ساهل

ليك بالمعنى لامكانى

لما يتحقق زمانى

نمسح الحزن المعشعش فى عيونك أسمرانى


يا حبيبنا تحيا فى حلم الترابله

فى العلاقات المعانى

فى البقاسى شقى المسافه

عايشه فى داخله وبيعانى

لما يتحقق زمانى

بيشرق الفجر الحقيقه

والصباح الأبيضانى

إحساس بالأمل

أدينى إحساس بالأمل فى كل .. رحلة شوق تطول

ودى الخطاوى الراجعة ليك .. فى سكتك وأمل وصول

ما الدنيا كلها إنتظار .. و ألارتحال قدر الفصول

الموجة تحلم بالضفاف .. والغيمة تحلم بالهطول

راحل معاى ضى الآمانى وذكرة فى الآيام هناك

لحظات بتذخر بالمعانى .. وكيف أنسى تذكارات هواك

نتحمل الغربة ونعانى و نصبر عشان نكسب رضاك

ونغنى لو زاد الحنين .. ويارتيو كان سفرا معاك

46/ الطيور

والله نحنّ مع الطيور

الما بتعرف ليها خرطة

ولا فى إيدا جواز سفر

نمشى فى كل المدائن

نبنى عشنا بالغناوى

وننثر الأفراح .. درر

والربيع يسكن جوارنا

والسنابل تملا دارنا

والرياحين .. والمطر

***

والحبيبة تغنى لينا

لا هموم تسكن دروبنا

ولا يلاقينا الخطر

***

إلاّ باكر يا حليوة

لمـّا أولادنا السمر

يبقوا أفراحنا البنمسح بيها .. أحزان الزمن

نمشى فى كل الدروب الواسعة .. ديك

والرواكيب الصغيرة .. تبقى أكبر من مدن

إيدى فى إيدك نغنى

والله نحنّ .. مع الطيور

الما بتعرف ليها خرطة

ولا فى إيدا جواز سفر

47 / جلبت ليك

جلبت ليك من بلادالله البعيدة

صنوف من الوجد .. المُلِحْ

قلت ألقاك فى السّمح

كنت بصطاد فى الظهيرة

من مناقير الكنار

بوصل السكك .. الأغانى

ومن ثُرى الليل القصيّة

أنتشل عطر الأمانى

ولو ألاقى اللون .. أدسّو

لمّا يغرس فينى حِسّو

لى ملاقاتك .. هدية

وأفقد الرعشة المعبّية .. فى إيديا

جلبت ليك

48/ عشم باكر

فى عينيك عشم باكر

وزغرودة بتزف لى الناس

خبر زمناً جديد مولود

لقيت غيرك .. بضيع إسمى

وبقيت أنا حى .. وزى مفقود

***

لاقينى يا عشقى الخرافى

لاقينى قبال الزوال

لاقينى فى كل المرافى

زفاف ربيع .. وفرح قوافى

وإنشرى فى حزن السنابل

غيمة يا كل المشاعل

وأمشى قبّال الصباح

وزعى الطل للأزهار

وأبقى يا شوقى الخرافى

خير .. وضمى شقا البيادر

***

لاقينى يا شوقى الخرافى

لاقينى قبال الزوال

غنوة من أزمان بعيدة

طالعة من صخب الدميرة

تلقينى راجيك فى الأماسى

وفى المراسى

وفى الملمات الخطيرة


49 أقراك مرة صاح

أقراك مرّة صاح

عكس إحتشادك فى الحضور

هل غاب معاك وعى الطريق

أم بيكى زكـّانى الزمن

ماشيك .. وعارفك يا حريق ..

فى يوم غماماتك .. بجن

فرهد غيابك .. أغنيات

ظلت أراضى اللقيا بور

بلقاكى يا كل الطيور ..

مسجونة والحرية .. سور

وبلقاكى بيناتنا الثبات

وبيناتنا شمس البكرة فى لحظة .. مخاض

***

طول الوجع رشـّح مواطن العافية .. فيك

خلانى أرجع وأبتديك

وأقراكى من كل الجهات

ومابين أقابلك .. ومشتهيك .. كان حلمك الأول

ترفْ

وكنتى الصبية الغايبة

فى زحمة حجا .. وكلمة شرف

كنتى الزوايا الميتة .. فى متحف خزف

كنتى الوصايا العشرة .. واللون الشحيح

***

سميت مساحاتتك حكر

كل البيحلمو ا بى الشمس

هجـّرت من واقعك .. عبث

سكـّنت فيك ..ضد السكون

كل اللى كان ممكن .. يكون

وطارت ضفيرتك ليل غنا

جدلة صبُر .. وطولة نفس

***

ومابين أقابلك وجيت عليك

كان عندى ليك بس نحنّ .. والجرح الثرى

وخيبة أمل أم الشهيد

فى الكلمة .. والوجه الجديد

وكان إحتقان نبض الزمن

نومة طفل .. فوق الدّمن

يا صاحية بى الحاصل علىْ

يا نايمة عن فقرى البليد

سميت منافيك الوطن

صبحت مناحاتك ..

نشيد

50 / البت الحديقة
حتجى البت .. الحديقة

شايلة أنسام فى طريقا

وشاتلا ألوان

حتجى البحدث بريقا

ضجـّة الضو فى المكان

حتجى المن بدرى جات

من ظلامات السكات

شايلة قمرين فى عيونا

وفاتحا ليلين بى جنونا

وطاوية ساحات إنتمت لى فجر فات

وتنتمى لى عصور جديدة

حتجى البت البريدا

ضاحكة .. منتصرة .. وعنيدة

آملة .. مزدهرة .. وجديدة

ناقشة فى الزول .. أغنيات

حتجى المن بدرى جات

من ظلامات السكات

واصفة لى الناس الطريقة

ولى العصافير .. الجهات

51 / الجالوص

معتوقة ومعتقة ومنعتقة

نوافير إنتشى وحشمة

وحمار العين

تضحك كلما وقعت مصيبة

تمشى على العجين و تلخبطو

ترطن إذا جاها الحنين

يا بت بيوت الهجعة كيف

غبار شوارعك ماشى وين

زقاق يعيش فى زقاق

كتمة وظلمة وإنعتاق

أنا فيك لامونى المساجين

سكاتك عليهم منازل حلال الحرام

سكاتك على حين أهش الحمام

سكاتك عليك لما تصحى المسام

سكاتك عليهم سكوت و السلام

صوتك وقت قطع البحر قبال مراكب العمدة

ضهر النيل عرق

و الشمس فوق حبل الغيوم

شرت جلاليب النعاس

ناشف غرب مبلول شرق

و المطرة زى شفع العيد

تدخل غرف كل البيوت

حكمة الجوع الشرح للأرضة

كيف تقرأ المرق وقبال يقع

فوقك سقف

إتنحنح الجالوص

أمرق على مهلك

مروق الحنة من ضفر العروس

واصعد على مهلك

صعود البذرة والروح والشموس

مبنية مدن الخوف

من طينة آخر الليل

وانا فى سقالة الشوف

قدح البصيرة تقيل

فاتح زريبة الجوف

تمرق تخش الخيل

على كيفك كيف معلوف

ضهر المظنة يشيل

وانا ظنى ظنيتو للنيل

غريق فى النيل

و الليل ولافى بالو ليل

ساكت يغنوا على القمره

واجعنى فى البحر السكات

سكتنى فى الوجع البحر

يا بت صباح الطير

وين البلد ركت

ما عاد هواك يفتح فى الكتمة

شباك النزيف

وين تكيتك فى الغيمة شطيف النجوم

ريف الجسد صدرك سبلوقة اللبن الخريف

داسينى فيك نضر

والأنبياء فاتوا

والأنبياءء بين بين

قاعدين فى ضل النار

داسينى فيك نضر

فى غفلة جو الكفار

وطارت حمامة الغار

لاقونى ناشف ومر

ماذنب جاد الطار

لو غنو بيهو شتر

ما تخافى الله معاك

وكل الملائكة سمر

52/ مزيكة الحواري


مانى غرقان فى التمنى
ولانى سارح بالأمانى
زارنى خاطراً بلّ شوقى .. وإحتوانى
النخل إتلاقى .. غنى
وردد النيل الأغانى
النجوم لامع بريقا
الورود النايمة .. فاقت
عطرت كل الجزاير بى رحيقا
الندى الراقد بفوقا
صفّقت جنحاتو غنت .. لى هوايا
***
دقوا مزيكة الحوارى
رقصوا البنوت .. أعرضوا
النخل زايد فى عرضو .. وفى علاهو
البيوت غرقت وراهو
وبرضو زايد فى علاهو
يحكى للدنيا الجميلة
سر عظمتو .. وسر بهاهو
***
ضى عيونك يا بنية
يضوى من بلداً بعيدة
تحملك لينا الغمامة
ويكتمل للروح .. نشيدا
وفى الدروب اللّيك تودى
بنسرج الخيل العنيدة
والحزن من نور عيونك
يلبس الفرحة الجديدة
***
وأنا راكب يا مراكب
لا الرياح توقف خطايا
لا الجبال .. تحجب رؤايا
ست شموس الكون .. منايا
ليك مسافر
ومن كتير الزاد .. مسافر بى غنايا
نوصل الشمس البعيدة
نبقى عيدا
نزرع الحب البيوقد
لى النهاية

54 / حاجة فيك

حاجه فيك
تقطع نفس خيل القصائد
تشده اجراس المعابد
توهتني .. تعبتني .. جننتني
جننت حرف الكلام
وبرضو ادتني السلام

حاجه في شرف المداين
وفي غرف كل السفاين
جوه في عمق المناجم والعيون

حاجه زي ما تكون محلق في العواصف
فجأة تهبط في السكون
حاجة زي نقر الاصابع
لما ترتاح للموسيقي
حاجه زي اخبار تناغم من جريدة
حاجه زي وتر الموانئ
لما يصدح لي سفينة
حاجه فيـك لا بتنتـــدئ
لا بتنتــــهي
خلتني ارجع للقلم
واتحدي بالحرف الالم
واضحك مع الزمن العريض
وانسف متاريس الطريق
واعرف متين ابقي المطر
وافهم متين اصبــــح حـريق

55 / مد لي يدك شيل سلاحك

مد ايدك وشيل سلاحك
لاك إضينة ولاكا خايب
لاكا زول تركة مزلة
لا بفوتوك فى الضكارة
انت شايف ...
غطّت الأحزان ربوعنا
وشتّت الطغيان جموعنا
مافى غير تحمل سلاحك
تحمى ساحك..
وتشفى بى ضراعك جراحك


هم أرازل .. ديل أرازل
خانو كل أعراف بلادك
جهزو سلاحهم فى غفلة
إستباحوك فى كرامتك فى أصولك...
قم تقدم .. أصحى من وهدة زهولك
شق طريقك ...
لى رفاق الوجعة منتظرين وصولك
فى صفوفهم خانة فاضية
إنت سيدة وطولة طولك
بندقيتك راجية جيتك تحمى قولك ..
شيل سلاحك قبل ما سلاحهم يطولك

56/ الرسالة

الرسالة الحلوة ريدك ما بريدك
الخطاب النمقت كلماتوا إيدك
قبل ساعات قبل مدة ..
جاني مرسال المودة ..
ياما شال وقلبي أدى ..
إحتفلت وعمري عدى ..
***
كل كلمة بتكتبيها ..
يا حلوة إنت تنمقيها ...
تضوي بيها فرح عيونك ...
لوحه زاهية بترسميها ..
قبل ساعات قبل مدة ..
جاني مرسال المودة ..
ياما شلت وقلبي أدى ..
إحتفلت وعمري عدى ..
***
كل كلمة ندية واحة ...
كل همسه شجية راحه ..
والحقيقة الرائعة إنت ..
شن بدورك صورة بنت ..
شلت رسمك والأناقة ..
إنبهرت وغبت ساعة ..
يا ماهل وعما عيدك ..
ما بريدك وزي ريدك ..
الخطاب النمقت كلماتوا إيدك..
قبل ساعات قبل مد

57/ أديني أحساس بالأمل

أديني إحساس بالأمل .. في كل رحلة شوق تطول
وأدي الخطاوي الراجعة ليك .. في سكتك عشم الوصول
ما الدنيا كلها إرتحال …
والإنتظار قدر الوصول ..
الموجة تحلم بالضفاف …
والغيمة تحلم بالهطول ..


راحل معاي ضي الأماني ...
وذكري للأيام هناك ..
لحظات بتذخر بالمعاني ..
وكيف أنسى تذكارات هواك ..
نتحمل الغربة ونعاني ...
ونصبر عشان نكسب رضاك ...
ونغني لو زاد الحنين ...
ياريتو كان سفراً معاك

58 / أيام زمان
والله أيام يا زمان … ببكي وأتحسر عليك
ومابيقولو العشناه كان … وأرمي حبت لومي فيك
والله أيام يا زمان ..
لسه راجيك يازمان … بحبة الذكرى المعاي
عايشه في وجداني جوة … ولسة بتدغدغ حشاي
ويمكن الحبيتو مرة … ألقاه في كلمات غناي
أصلو بتصحي المشاعر … ويمكن الطول سهاي

تغشى ليلاتو البشاير .. ويمكن الفرح الزمان ..
لسة أصداه بترن .. غنوة حاضناها الضفاير
والله أيام يا زمان ..

جايز الأيام تحن … وتصحي فيك نبل المشاعر
ويمكن المجروح يئن … وتغشى ليلاتو البشاير
ويمكن الفرح الزمان ... لسة أصداه بترن ...
غنوة حاضناها الضفاير ..

59 / رعشة الشوق

مرة بقصد احكى عنك

وقولى من طابعو البشارة

شوفو ديك القمرة بانت

والنجوم حاطت مدارة

غيبو اتلاشو فى عيونة

وغوصو فى اعماق مدارة

وابقو اعرفو من صفاها

كيف صبحت اسيرة هواها

وراسى فى ابعاد قرارة

***

الا لو مرات سرحت

وقمت لمحت وقرونى

وعرفو كل البينا عامر

اصلو باين فى عيونى

اعرف انو بحسن نية

باحت الاعين شوية

افشو سرى وغافلونى

واتعرف ريدك متاعى

وانو فكرى واقتناعى

والسعداة الضالة كونى

وبسالك يا زارتى عنك

والبراءة الفى عيونك

الرزانة الفى انفعالك

والضجيج الفى سكونك

انت ابعد من خيالى

ورعشة الشوق فى سؤالى

بتحكى عن ابداع محاسنك

وعفة الطبع البصونك

60 / لو مستني مني الملام

لو منى مستنى الملام

يا سلام عليك يا سلام

يا حلو دة السكوت مرات كلام

وعدم الملام هو كمان ملام

يا سلام عليك يا سلام

***

انا يا غرامى وصلت بيك

فى الدنيا لى حد الغرام

ولقيت ملامى على عينيك

يا سيدى زى الما ملام

يا سلام عليك يا سلام

***

الورد لو فات الفراش

ما اظن تلومو مع الندى

ما بتجرح احساسو الجميل

والريدة يا حنين كدة

يا سلام عليك يا سلام


61/ الشوق والهواجس

في عيونك ضجة الشوق والهواجس ..
ريحة الموج البنحلم فوقو بي جية النوارس ..
ياما شان زفة خريفك ..
كل عاشق أدى فرضو ..
ما في شمساً طالعة طلت ..
إلا تضحك ليها برضو ..
والغمام الفيك راحل ..
في الصنوبر يلقى أرضو ..
والصباح إمتد ياما ..
كل ما جاوبتي نبضو ..

نشتهيك ...
ياما نحلم نحكي ليك ..
عن المسافة ونشتهيك ..
عن سفن بالشوق بترسم ..
في بحيراتك ضفاف ونشتهيك ..
عن ملامح غنوة طلت ..
في عيويناتك هتافها وبنشتهيك ...
عن حقيقة نهاتي بيها ..
وفي أساطير الخرافة ..

يا صباحات المواني ..
حتى لو دربك ترنح ...
في مشاوير الأغاني ..
والجرح إرتد بينا ..
لي زمان الآهة تاني ..

يانا لا بنتحاشي صدك ..
لا بتموت فينا الأغاني ..
يا غنانا المشتهنو ..
ياني موعود بي زمانك ..
بي إرتعاش صرخة وجودك ..
يوم يطل ميلادي منو ..
لما إتوسد صباحك ..
ياتوا ليل يفصلني عنو ..

62/ طوريتك


حتى الفصول صابه الجفاف ...
لا غيمة لا زفة هرع ...
والسنمبر البفرح صغيرة ...
غشانا وإتقاطر رجع ...
وشجرنا من لفح السموم ...
عطشان وقع ...
لاشابا لريحة دعاش لا هش لى برقاً لمع ...

طوريتك في الطين مرمية ...
وكوريتك يابسة ومجدوعة ...
لاغيبتك كانت مرضية ...
ولا فوتك كانت مبلوعة ...

اللهب الضوى الليل قناديل ...
في عيون النجمة القطبية ...
والتعب المد ضراع النيل ...
سجادة فقراء مزاورية ...
سائلين عنك ويوماتي رحيل ...
لمواني المدن النفحاية ...
وشقيش ما تقبل يا أبو الحيل ...
في قلوبنا مواجعك متكية ...
تايهين في بحرو مراكبية ...
أطفال عمال ومزارعية ...

كيف حال يا أبوي ...
كيف حال يا خال ...
بتمسي بيوتنا الكاكية ...
حزنانة بتبكي مال الحال ...
والزمن الساقكم عيدية ...
طوريتك في الطين مرمية ...
وكوريتك يابسة ومجدوعة ...

63 / السمحة قالو مرجلة

بعدك الفريق أصبح خلا ...
والسمحة قالوا مرحلة ...
جاني الخبر جاني البلا ...
والسمحة قالوا مرحلة ...
قول يا لسان في الراحلة ...
صوغ المعاني وجملا ...
نافر وما عارف العلي ...
حال العلي حال الخلا ...

يا عيني جافيني المنام ...
وخدودي دمعك بللا ...
وين بعدك ألقي عطوف ...
يلم أفكاري بعد البهدلا ...
روح يا نسيم روح قابلا ...
تلقاها نايمة وغافلة ...
داعب بخصلات شعرها ...
وألثم ضفايرا مسدله ...
وأرفع كتيفها الهادلا ...
وكال خدودها وقبلا ...
وقول ليها من بعدك ...
خلاص شفت الرفيق أصبح خلا ...

يا ربي لحظات الوداع ...
أمثالي كيف يتحملا ...
الليلة بوصيك بالحبيب ...
عندك أمانة تحملا ...
وتديم على الخير والهناء ...
وكل يوم تضاعفلوا الحلا ...
قلبي الحنين من قام صغير ...
طول عمره لا جفا لا سلا ...
والسمحة قالوا مرحلة ...

64/ يا فتاتي
ايوحشنى الزمان وانتِ انسى ويظلم لى النهار وانتِ شمسى
واقرص فى محبتك الامانى واجنى الشوك من ثمرات قرصى
لقد جازيت قدر عن وفائى وبعت مودتى ظلم ببخسى
ولو ان الزمان اطاع حكمى فديتك من مكارهه بنفسى
يافتاتى ما للهواء وطناً وكل قلباً بالحب يبتهجو
وانا ماخولقت فى بلداً فى حماهو الحب متهضو
فلماذا اراكى ثائرتً وعلاما السباب يطرضُ
الان السواداء يقمرنى ليس لى فيهو يافتاتى يدو
اقريب انك تعلمى ريدى ليك ولي جلدو
لى دنيا مثل مالهمو فيه ماضاً وحاضر وغدو
اى زنب جنيت فندلعت ثوره منكى خانها الجلدو
الوداع الوداع قاتلتى ها انا من حماكى ابتعدو
سوف تناء خطايه عن بلداًحجراً قلب حوائه صلدُ
وسوف اكتم الجراح فى كبدى غائراتاً مالها عددو

65/ هردت لهاتي
سنى على النضال ايدى
سوكى بالهتاف فمى
شوارعك لى دويها على
اذا مااخر العلاج الكى
مراويدك حمر حمى
هردت لهاتى بالغنوات
وقت يبرد حشاك يمى
من التعب البلا صالح
تقيفى تروقى تنجمى
تسوى مكانسك المطرة
تضوى البيت وتنحمى
تمرقى صبوحة للجيران
قدح فوق ايد وفى ايد المى
يلاقوك شفع الكتاب
نضاف وظراف بلا النسمى
يغنولك غناوى الساب
وفى بيوضة مافى سراب
جبال كجبى وفيافى الكاب
تميل بالخضرة منقسمى
فيافى الصى وبيوضة
البراسيم فيها مفروضة
خدارا يرارى شوف عينى
على الابواب
قماريها......وطواريها
وحواريها
بقت روضة
بقت تشرب من الحامداب
تشوفى رهاب بعد نضمى
واشوفو قريب قرب نضمى
اشوف العالم التحتانى
هيلا هوب
وقف ناهض
هد عمايد الفوقانى
وجوة الجب رمى العارض
وفى السابو الدمار افراق
عريق الحب نبض قابض
متل قبض الحروف فى اسمى
وغناوينا القبيل رقراق
علينا تصب برد قارص
واجر نمى وادودى لهاتى بالغنوات
عقب يبرد حشاك يمى
وطنى ولا ملى بطنى
سكاتى ولا الكلام النى
بليلتى ولا ضبايح طى
قليلتى ولا كتر سمى
سلام يمى
سلام لا همى لا دمى

66/ رسمت في وجيهة
رسمت فى وجيها بسيمة ضو
بتغالط فى الزمن القاسى
بتعاتب فى الغنوة الصعبة
وفى لحن حزين
ووتر موجوع يحكى احساسى
تسال عن شدو الافراح
يمكن لجراحنا يكون ناسى
مابشبع روحنا فرح زايف
لو كان بتناسى وتتناسى
يابت يانيل
العاشقك عاشق كل الفيك
غنايك فى كل ظروفك
فى الفرح البدفق وعد وفال
والحزن الودر ضى شوفتك
فى سجون القهرك فى جوفك
فى النبض الصامد فى البركان
السامعو يدمدم فى جوفك
جرحنا عتابك ياباكية
وعايزانا نغنى غنى الافراح
مالغنوة الناشفة لبن ضرعك
والفرح الفيك خلانا وراح
ولقينا فرحنا وانت حزينة
بيكون اشتر ويزيدنا جراح
خلينا من الفرح الزائف
بتعود افراحنا وتلقى براح

67/ لا بالحزن الفينا حنرضى
لا بالحزن الفينا حانرضى
لا من خوف سامرنا انفض
ومابتطفيك الريح ياومضة
رغم الصبر المر حاضننو
رغم الحزن الطال عايشنو
اصلو البحر....المد....الجزر
الفرح الحزن بيطلع منو
تعالى نغنى
تعالى نعيش احساس الفرحة
شان من عمرى وشان من عمرك
سنين الزمن البجرى وبمضى
ماتغشانا تشيل فى لمحة
رنين الضحكة الحلوة السمحة
لما نغنى القمرى بيرجع
لما نغنى الغيم بتجمع
والامال الغابت ترجع
بس وحياتكم عيدو المطلع


68/ سافر
سافر مطارات الوداع
ضجت قدامك وراك بيضا
وسماك غناى
مساحات الاسى الفى عيونا
تتفجر مدينة وناى
بطاقات دعوة الرجعة
تساب عينين من الفرحة
دموع للحاضرين فجت
زغاريد غطت الدنيا
وعاد فرح الرجوع منية
صداك الريح ومن السنبل الغناى
كتير بنعاتب الحاضر
ولا اسفا على الماضى
صدق الرؤية من قلبك
نغم فنان يعيش راضى
مداك اتعدى حد الشوف
دخلت على الشعر انسان
هواك اتخت جوه الجوف
وانتحر النهار هسة
نغنيك لى مدن شاخت
معاك احلامى ماتنسى
تغنيك الغنى الراحت
خلاص ياغربة ماترسى
غنياك وبنغى
وبتحدى الزمن فنان

69/ اذا عادت الأيام للماضي
اذا عادت بنا الايام للماضى
كتبت على ثوانى العمر شعرا لايدانية
غناء الطير وهمس الماء وشوشة الضياء فية
ركبت زوارقى ابحرت فى شعر لها مجدول
جعلت مشاعرى جندول
اذا عادت بنا الايام يوما ايها الاحباب
ولو فى زورق يمضى على الصحراء غير سراب
انا ملاحة الفرحان يطرق مغلق الابواب
ادق ليس يعنينى لانى قادم من حاضر اللحظات
للماضى
ولى شوق سيشعل صمت هذاا الزورق الهادى
فيدفعة الى الوادى
الى افق انيق النجم صداح البساتين
واشدو حين تاتينى فتاة لثغة العصفور
انفاس الرياحين بكفيها
ولى فى عمق هدبيها حكايات واشعار
ولى فى شعرها المعطار اخبار
اذا سالت على وديانها الخضراء امطار
اذا عادت بنا الايام للماضى

70 / مت في قلبي
مت فلبى ولم ابكى عليك
فمعين الدمع قد نضب قديما
قبل ان ادنو اليك
ان عقلى يتعجب
كيف قلبى فيك يخدع
وتقول لى
صرت قلبا من حجر
انا قد مزقت قبلك
وتناثرت بعيدا
مثل اوراق الشجر
وتجرعت كؤوسك
وتوسدت الضجر
مت فى قلبى فدفنتك
خارج القلب الحجر
تربتى اطهر من ان يدفن فيها من غدر
هكذا الغدر امر
عدت من دفنك وحى اتالم
وادارى قلبى المكسور غدرا ...اتبسم
واغنى للربيع الغض بالاشواق والامال مفعم
ذبحت كفاك قلبى
وتقول لى صرت قلبا من حجر
انت ظلم.....انت جور
انا احساس وحب وشعور
انا فى العالم فرحة
انا فى الظلمة نور


71/ كبف أنساك
كيف انساك وانت الجرح النازف
منو خريف الحتة
خريف المحل المابتدارك
ونجم الطالع شيل وختا
رحل الديرة وهج وديرة
فرع الحنة النور حتة
جرحك نيلة وسيرة طويلة
وشافى البلسم ابا يتختة
سبر العاشق كتر الليمة
ولم الشمل الروح شتا
سبر الروح الكلمة الزينة
ونفسا طيب مالى الحتة
غلب الراوى تملى حكاوى
وغلبنا زيك مااتعودت
آهه حزينة وانة دفينة
تخفف عنى لماما حتى
كيف انساك وليل الشارع
رم ستايرو وقف الحتة
وبرج الدالى انشر بدالى
حوش ليك ايام الستة
يوم الليلة يمر بى صبرو
احلام باكر كيف تتاتى
يامغلوبة وغالبة زمانك
كيف انساك محال البتة

72/ ادفقي
كيف اجاوب عن هوانا
لما يغلبنى السؤال
لما يتارجح منانا
بين مظنة واحتمال
مابحسك
دونك انتى الحقائق فى الظلال
والحرف بيعرف مداة
حتى لو جن الخيال

ادفقى

ماتكونى رقراق
ابقى ياضل ياشموس
غطى المساحات بالوضوح
استنهضى الشوق الجلوس
وهجك شوارع ذاتى فى ليل اليباب
ماتخافى من دم الغروب
لو رتش اللوحة الضباب
مادام ضميرنا الفينا حى
مادام عريق العشق حى
ملحوقة يامدن السراب
ماتشفقى
العطش الرحيل
النيل ركيز
ودمعة الاحباب سحاب

ادفقى

فيضان عمار
اتربعى وفجى الوجع
دمع الالام.....مايدفقك
ماخاب غناك
فارسك رجع
اتوهجى وانتى الشمس
اتلهجى ونورك سطع
نور بوادينا الكساح
لاقصت مزامير الصباح
مبكية قرية وقنبلة
متكية دمعة وسنبلة

الليلة فى ايدنا السلاح
ريشة وكدنكة ومطرقة
نبنيكى احسن ياظروف
مخضرة دانية القطوف
نطوى المسافات نسبقا

ادفقى

بلدك فداك
اتوهطى
ورى البنيات العديل
محمية بى عرق الترابلة
ونغمتك مسقية بالريد العتيق
انغام ربابتك تشيل
معزوفة الريد والرفيق

ماتصغرى

تكبر امانى السنبلة
هى اكبرى
تصغر معانى القنبلة
ماتصغرى

ماترجعى الصد للمداين والفرى
شيلى الشحوب والاصفرار
ادى البويتات منظرا

ادفقى

فى كل شارع وكل بيت
فى روابينا المحنة
وفى ضمايرنا السهول

ادفقى

فى كل حتة وكل زول

ابقى شان تبقى الفصول

73/ عمنا الحاج ود عجبنا

فى الفريق ياهو الركيزة .. هو البشيل حمل الرضاعة

وعنده كلمة على الجماعة .. وفى الفريق باقلنا سابة

وكل طيب ليهو غاية وللضعيف .. تلقاهو سادرويقهر الكعب المعاند

للضيوف ديوانو فاتح .. ديل يقوموا وديل ينزلوا

يا ولد جيب الرتاين وجيهوا الديوان فراشو

افرشوا الفراشة الكبيرة والإباريق .. والتباريق

وأضبحوا الحمل المدوعل ..

عمنا الحاج ودعجبنا فى سنين أيام جهلتو .. ديمة فى دعوات صلاتو

يسأل المولى السلامة .. وسترة الحال .. والكرامة

وعمنا الحاج ود عجبنا فى ليلة من ذات اليالى .. من زمن حظر التجول

جاهو ضيف فى راس حداشر .. رحب الحاج بيهو جدا فرشولو

ونزلوهو وكاسوا للعشاء ما أتلقالو ..ما الرغيف ممحوق مقصر

والبلد فى حال معسر

وعمنا الحاج فى مكانتو و جيت الضيف زى فريضة

وهسة ضاقت بيه العريضة .. ضيفوا كيف يترك عشاهو

من زايد إختشاهو .. وجاتو فكرة

يمشى للفرن المجاور .. ولى لجان العيش يشاور

بس عشا الضيف يا جماعة .. وضيفى نازل ليهو ساعة

شاكلوهو ودفروهو ونهروهو .. وجاتو دورية الطوارى

وأمسى بايت فى الحراسة .. وناسوا جنوا

للصباح ما عرفوا حاجة .. وين دا روح وجاهم الخبر المؤكد

ود عجبنا فى الحراسة .. ماشى دورية محكمة الطوارى

ناسو أولادو وبناتو عرفوا حالوا وبدرى فاتوا

راحوا دورية محكمة الطوارى .. فيها فى نص الخلايق

شافوا حالا ماهو لايق .. عمنا الحاج بى جلالو

فوقو حس السوط يولول .. فوق قفاهو وفوق سنونو

فوق رجولو ومرة فوق حجبا حشاهن .. أصلو ما قايل يكونن

حتى كان نزلن هجايم .. إلا لكن الليالى .. بترفض كل سارى

حاكموا الولد المنصب .. كتفو بالدبور مقصب

إنت يا حاج يا مخالف .. زول مخرف وعقلو تالف

إنت يازول ماكا دارى .. قلة الناس فى الطوارى

أجلدوهو وغرموهو .. ونفذوا الحكم البيهينو

شان يفتح تانى عينو

تسمع السوط صيحتو داوية .. وتسمع السوط ليهو خاوية

وفوق قفا الشيخ صيحتو داوية .. وفجاة رفع الحاج عيونو

شاف بنات ولدو وبناتو .. كلهن واقفات يعاينن

دمعتن فى العين ترقرق .. وجعتن فى الجوف تحرق

و الحزن بيهن يفرق .. دى النجوم الفى سماهن

كل سوط نازل عليهو ..من شعاع الضو عماهن

عمك الحاج دمعو فره .. وسيلو فوق أشنابو بره

تم حكمو وراح بيوتو .. نفسو مكسوره وزليلة

كيف ملاقات الحليلة .. وصحوة الروح العليلة

يالبيوت الجوه غادى .. عمك الجاج ما اعتيادى

فوقو متلمين جماعتو .. والسكيلى ضارب حزاينى

وقالوا ناداهو المنادى .. فارق الدنيا المتينة

يقطع الزلة وسنينا .. فوق فراش ود حاج عجبنا

بسمع الزول البوطى .. أقفلوا الحوش يا جماعة

طفوا أنوار الرتاين .. داك حرس حظر التجول

من بعيد ليكم يعاين ..يا زمن حظر التجول

يا زمن حظر التجول .. يا زمن حظر التجول

74/ الدنيا ليل
الدنيا ليل غربة ومطر
وطرب حزين وجع تقاسيم الوتر
شرب الزمن فرح السنين
والباقى هداه السفر
ياروح غناى
الغربة ملت من شقاى وغربتى
وبقيت براى حاضن اساى
الوحشة ملت من اساى ووحدتى
لا غنوة لا موال يبدد حسرتى
غير الدموع
ياملهمة
الغربة مرة ومؤلمة
قولى للنيل ضفة ضفة
والعشيات لما تصفى
والنسيمات البتاخد من عفاف ريدتنا عفة
انو شوقى يفيض بحر
شوقى شوق انسان مضيع
ضيعو الليل فى السفر
لا ينابيع ريدى جفت
لا ولا اشواقى خفت
كل يوم فى غربة زايدة
بيها كل الدنيا

75/ القاك وين
القاك وين
كان الفرح قفل مسامات الضياع
غناك مزمار الزمن
ارشيف عشق واصوات نغم
وتر التراخى موشحات
نلقاك وين
من غبتى ماشرقت شمس
والدهشة ساساق الدروب
لى وين تمش
نار النضال لو تنهبش
توقد سنون المتعبين
تعقد زفاف اخر ضمير اتباع مقنن بالقرش
نلقاك وين
كان التعب ماخت ايدو
على جبين تربال يخم رمل الشقا
المليان غلب
دقست قوافلو مع السراب
رابط جليد الهم سعن
محزوم خشيمو من الصبر
راجى السحاب
نلقاك وين
انا وانت والنيل والارض
والبور مشتت متنسى
ونجامة التعب الكعب
ماكان عول ريدى
ريدى الصبح صفصاف هدير البر
ايامى توب شحات
هزاه خم وخم
انا مالقيتك ليه
طعم الفراق دم دم
ختيتى فوقى الليل
والليل سقانى السم
انا خاطرى فى المطرة
ريحة الدعاش تنشم

(اللللللللللللللللللللللللله على ريحة الدعاش)

76 / يا سر مكتوم
يا سر مكتوم
فى جوف اصداف
بقليب نزاف
لا خبير يهدى لا دليل وصاف
داجياها الريح وكتين ماتطل
على موجة تمرجح زهرة فل
وتشيلا تروح والدنيا تنوح
على قمرا مات فى مطر الليل
يتم نجمات بكاها السيل
يا سر مكتوم فى جوف اصداف
الريح القاسية عنيدة تمام
طفت القنديل الكان مقدوح من دمع الليل
رمت القنديل الكان نديان فى جرف النيل
رسمت احزان
وسؤال حيران
فى عيون ايتام
ياعمر مرسوم فى كف اقدار
ياخطاى الطال بيها المشوار
ياليل مشتاق لى دفقة نور
ياظلمة تبكى سنا البلور
ياموجة تعاند فى التيار
ياخطاى الطال بيها المشوار
77/ انطفاءات القصيد
جيت وانتظرتك فى المسافة الخاصة
بين الف المغنى وانطفاءات القصيد
نفس المحطات القبيل مشدودة بحبل الضياع
بحز الحرف الموسم بنداك....
فاقد صباحات الفرح
وصباحى من طلة خطاك
نفس السحوب سارت
اهازيج الامل فى وسط الدروب
سالب مشاويرى المعاك
نشوه مناداة الرؤى الوضاحة بلون الغروب
سحق التطلع لبروز جذوة خطاك
قص المحطات القبيل
غربة ومحطات اختصار
مسره عدم مروية بمطر العشم
ونغمة نسيم.... هبة نشاز... لحن الودار
جيتك مؤقر بعذاب الانتظار
وقبول الجوة فى الاطار
تسقينى مرة بمر حواسك والاديم
كل الحلول هجعة اصيل
تسقينى مرة ثدى الصبر
من نفس المحطات القبيل
78/ حسنك بديع
حسنك بديع معدوم مثالك
حير عقول وصف جمالك
يابهجة يافرح الحزين
امنت زيك مابكون
حوط نغم يوحى الاغانى
تتهادى زى الناس مكانك
عليك قليل كلمة جميل
وصفك تحار فيهو المعانى
اجمل عيون فيك شفتها
عيون المها مابتشبها
منى الكلام بيضيع دوام
قدامها والقاهو انتهى
امرك مطاع ابدا يازينة
انت الجمال والناس عليك
بسمك سنا....
ولفظك غنا....
كم بيهو ياسمحة انتشينا

79/ علمي عيوني السفر
علمى عيونى السفر
ماالبسافر فى عيونك
سكتو بتبقى السلامة
ينسى احزانو وبعرف
الدنيا جنبك ابتسامة
ضللى للناس المكانة
وابقى ليهم ضل غمامة
القى اللازمنى مدة
يوم يفوت والفرحة تبدا
مابقول فارقنى عدى
عشان بخاف ترحل عيونك
وتنهزم فينى الامانى
وبى شقاهو وبى اساهو
تانى يتوشح زمانى
عايز اقول كلمة وداد
لو بترضى وتقبليها
اسالى الدمعة البتنزل
من شقاى انا اساليها
وعلمى عيونى السفر
ماالبسافر فى عيونك سكتو بتبقى السلامة
لو الومك انت يوم
مابكون قصدى الملامة
بس بكون قاصد حنانك
تبقى لى ضل غمامة

80/ أغيب عنك
أغيب عنك يضيع سر الحضور مني
يضيع فيني
شعور أني..أنا الانسان
وأكون بعدك وحيد وحيد
شئ تايه في سراب عالم
ورا العالم بعيد وبعيد
بلا زواده وبلا أمكان
وأغيب عنك
أشوف كل العيون ضدي
أشوف الكون صبح سرداب
بلا سكان
عدم لا ضل ولا ألوان
كانو لا انخلق لا كان
وأنا المصلوب
علي أبوابو طيف ذكري
ودليل عبرة وشهيد فقدان
وأنا المكتوب أغيب عنك
وأصبح في هوة الازمان
أنا المجروح
لغاية غاية الغاية
ولحد منابع الأحزااااااااااااااااااان....

81/ دابو ابتدا العمر الجميل
دابو أبتدا العمر الجميل
وتعبت من شد الرحال وتعبت من تعب الرحيل
يا أجمل الكلمات احبك
يا ملاذ القلب من حزنا طويل
جيتيني لما خلاص بكيت
علي نفسي مرة ومرتين وقعدت في الركن الحزين
داسي الخطا وصفر اليدين
بس كنتي وين العمر كلو....كنتي وين
وان في انتظارك من متين
من سنين وسنين طويلة
علي الدوام
واهو أنتي في جواي ملامح
صاحيه في عز المنام
فتشت عنك في الصحابه
وفي الغنا ورد السلام
وفي شرايين القصيدة سألت عنك
وفي المحطات البعيدة سألت عنك
وفي سبيل القاك كم يا ما جيت
وبكن خطاي
واهو أنتي قدامي ومعاي
تصحي وتنومي تحت عيوني
وتسري في أعصابي...تسرحي في دماي
ودابو أبتدا العمر الجميل
وتعبت من شد الرحال

82 / أنوار المسا
ما بان عليك سفر العمر
لسه الربيع يا دابو زار
لسه الضفاف المشرعة
بتفيض ندي وتطرح ثمار
الناس عليك ناداها فال
في عيونها نام الانبهار
وأنا جوه قلبي المشتهيك
نزفت جراحات الودار
جوة العيون أطفال فرح لمة زفاف
جوة العيون تشرق شموس يرحل جفاف
أزمان بتغرق في النعيم
وحنان غمر عاشقين رهاف
وأنا جوة قلبي المشتهيك
تزفت جراحات الودار
يا زهرة طالت بالفرح
بتراقص أنوار المساء
ما بان عليك أثر القطاف
ولا جاتك أيام القسا
ما أروعك وانت الشباب
بحمرة الريد أكتسي
وأنا جوه قلبي المشتهيك
نزفت جراحات الودار

84/ رغم ريح الصد
رغم ريح الصد عتية
سابحة في موج التباهي
تبني قصرك في الخيال
وحلمي ضائع في التناهي
زي مساحات الجمال
في العوينات السواهي
ضفة فاتحة مداها ألفة
والطيور فردت جناحا
شادية بي روعة غناها
وشحت ميلاد صباها
الوطن في عيونك انت
دنيا غرقت في السماحة
ورغم ريح الصد عتية
باقية للأفراح مساحة
واحة واحة شموسنا ترحل
عن مداينك ديمة تسأل
ساحة ساحة الغيمة رشّت
اليباب الياما طوّل
ورغم ريح الصد عتية
انت لحظة ود ندية

94/ : مدن عينيك - لمحتـك


لمحتك

قلت بر آمن .. بديت أحلم

ألملم قدرتى الباقية

وأشد ساعد على المجداف

تلوّح لى .. مدن عينيك

وترفع لى منارة بسمتك .. سارية

وبديت أحلم

***

كل ما الريح .. تطارد الموج

أزيد إصرار وأحلف بيك

أغير سكة التيار

وأقول يا إنتى .. يا أغرق

أخاف

غيم المنى الشايل

تسوقو الريح .. ويتفرق

أخاف .. وأخاف

***

وأشد ساعد على المجداف

وأجيك بى قدرتى الباقية

حطام إنسان موسّم بى شقا الدنيا

ومقسّم قلبو فى الأحزان

أجيك فنان

أشد أوتارى .. وأحكيلك

حكاية إنسان وهب لى سكتك نفسو

ورسم صورتك على حسّو

وربط ساعد على المجداف

وقال يا إنتى يا أغرق

أخاف

الضفة ترجع بيك .. قَبـُل ألحق

أخاف

غيم المنى الشايل

تسوقو الريح وإتفرق

وألاقيك يا أمانى سراب

مواهبى عليهو تتدفـّق




95/ نشــوة ريــــد

نشوة ريد .. إحساس إكليل
وردة وصلك .. جنـّة أصلك
نجم الليل الوصل جميل
**********
نحنّ مشينا الخطوة الأولى
وإنتى معاى مشوارنا بيقصر
بكرة بنحكى الشوق للذكرى
نار الريد الغابت .. تظهر
*********
الأطفال يافاطنة بغنوا
الأفراح لابد من ترجع
الأحلام الدونك فاتت
لو واصلنا صباحا بيطلع





96/ فات اوانــك


فات اوانك وعدى من وشك

صهيل الاغنيات

ياتو فى كفك صبح

غير انغماسك فى الشتات

يا بشوش المعنى

ما صادك بشوش

وصحيت على حلم الفتات

فات اوانك

********

الليلة فجات من سحاب الخلف دور

صحا القوافل فيك من الزمن القبيل

وبكيت فى صدر السما السابع

غموض المسالة

اشمعنا ما قادرين تكونو

وكيف تجيبو الاسئلة

فات اوانك





97/ ضليت

ضليت .. هرب منى الأمل .. جنيت
جافانى الشروق .. حنيت
كنتى معايا .. فى لمـّة دليب .. شاشاى
فى إيقاع حشا المردوم
فى جيد الزمن .. سوميت
************
مرقت .. على محطات السفر .. غربة
وما لقيتك .. أمل شارد
مع إنك معاى فى زحمة المشوار
وحتى يقينى عاد من تانى
صحـّاك فى حنين ذاتى ..
صحـّاك فى حنين ذاتى ..
*********
تعالى معاى....
تعالى معايا من زفة نفس مسدار
وما جرتق فرح .. كانت
ولا طعم الشقا الروّح
خطاى هانت
وإنتى معانى شايلاها القوافى
معزة فى عمق الفرح .. دوبيت
وكت ضليت
.. قعدتّ براى .. وحسيتك
بتطلعى من نفس طورية ضامـّة الطين
ومن دمعة وجع طوّل
ندا العرق البنادى .. حنين























بـاكـر ضــــوّاي 98/

متخبية والناس شايفنك

باباى ونخيل

متخفية والناس عارفنك

قرآن وإنجيل

وشقانا معاكى .. هو إنـّك

طاويك الليل

لكن واردنك .. وراويانا

لا عيون تحزن .. لا دموع بتسيل

*********

يوم بكرة جميل

ضوّاى .. ووسيم

يوم بكرة جميل

باكر .. دافـِر

يوم بكرة جميل

أبداً لا أتغرّب .. لا مسافر

باكر ضوّاى

وجميلتو الليل الما سوّاى

كان حاول يطمس أقمارو

يوم بكرة جميل

أبيض ريحو

من فالو النيل يطمح طوفان

وتخاف من موجو تماسيحو

باكر ضوّاى

كلمات وأناشيد .. وقيامة

باكر ضوّاى

وغناهو الحادى .. الهدّاى

يوم بكرة جميل

99/ الحزن النبيل

وبقيت أغني عليك غناوي الحسرة والأسف الطويل

وعشان أجيب ليك الفرح .. رضيان مشيت للمستحيل

ومعاكي لي آخر المدى .. فتيني يا هجعة مواعيدي القبيل

بعتيني لي حضن الأسى .. وسبتيني للحزن النبيـــــل

ومشيت معاك كل الخطاوي الممكنة وبقدر عليها وبعرفا

أوفيت وما قصرت في حقك ولا كانت عرفة غيرك أصادفا

وقدر هواك يجيبني ليك .. جمَع قلوبنا وولفها

وقتين بقيتي معايا في أعماقي في أعماق مشاعري المرهفة

لا منك إبتدت الظروف لا بيك إنتهت الأماني المترفة

ندمان أنا ؟! .. أبداً وحاتك عمري ما عرفت الندم

ما أصلوا حال الدنيا تسرق منية في لحظة عشم

وأنا عندي ليك كان الفرح رغم إحتمالي أساك يا جرح الألم

كان خوفي منك جاي من لهفة خطاك على المواعيد الوهم

وأهو نحن في الآخر سوا باعنا الهوى ماشين على سكة عدم

… وبقيت أغني عليك غناوي الحسرة والأسف الطويل


100 / شعاع شمس الأغاني

زي شعاع شمس الأغاني ..
جا الحنين عاودني تاني ..
كنت راجيك لو تضلي ..
وكنت ليك كل المواني ...
داير أصارحك بالبحسو ...
وبالأسى وزمن الكآبة ..
---------------------
القصايد سألة عنك ...
في الحروف باين عتابه ..
جاني الحنين عاودني ...
تاني ليك للغنى والكتابة ..
زي شعاع شمس الأماني ..
جا الحنين عاودني تاني .
------------------------
لما سبت هواك رحلت ... لي دروب بالحب بخيلة ..
للضياع سلمت عمري ... وقــلت مـا بـالـيـد حـيـلة ..
وزي شعاع شمس الأماني ... ساقني لي كل المواني ..
إنتي يا الراجع صباحك ..
بي بشاشتك وبي سماحك ..
بعد ما الأيام شقتني ..
وإنتي كم نزفت جراحك ..
وزي شعاع شمس الأماني ..
كنت ليك كل المواني ..



101/ صابرين 1

يا حزن الغنى ... صابرين ..
من بعد الضنى ... صابرين ..
على وعد المنى ... صابرين ..
برجاك يا وعد الحبيبة ..
بلقاك في الفرحة القريبة ..
بشراك يا أم الثنى ... صابرين ..
يا حزن الغنى ... صابرين ..
من بعد الضنى ... صابرين ..
على وعد المنى ... صابرين ..
-
---------------------------
لا ليل ولا حزن طايل ..
لا صد ولا دمع سايل ..
لا هم جاك يا أم نفايل ..
النيل فاض وإنحنا ..
نيلين وحزنك وحلمك أنا ..
فرعين شايلين جنى ... صابرين ..
ســـــــــــــلامات ..
عشرات حبابك ... سلامات ..
يسلم شبابك ... سلامات ..
شايل سحابك ... سلامات ..
القبلي شابك ... سلامات ..
وهواك هنا ... صابـــــــــرين ..
عاشقين ترابك ... سلامـــات ..
يا حزن الغنى … صابـــــــــرين ..



102 / واق براك

وافق براك والهم عصف .. ريحاً كسح زهرة صباك
ليلاً فتح شرفة وجع .. قمراً رحل فارقك سماك
مطر الحُزن عاود هطل .. جدد عذاب الأرصفة
ضئ المصابيح البعيد .. أتعب عيونك وإنطفأ
لمتين مواعيدك سراب .. والريد شقا وحرقه وجفا
وافـــق بـــــــــراك ...

------------------------------------------------
بعد المشاوير البقت .. ممدودة في نبض التعب
بتعود وتلقى رجاك زول .. حفظ الوداد زمناً صعب
والباقي من ليل الهوى ..
عطر الصبابة الما إنسكب
والباقي من كل الغنى ..
سيل الكتابة الما نضب ..
واقـــــــف بـــــــــــــــراك ...
واقـــــــف بـــــــــــــــراك ...


103/ سفر العمر


ما بان عليك سفر العمر ..
لسة الربيع يا دابو زار ..
لسة الضفاف المترعة بتفيض ندى ..
وتدفق ثمار ...
الناس عليك ناداها فال ..
في عيون تناغم الإنتظار ..
وأنا جوه قلبي المشتهيك ..
نزفت جراحات الودار ...
--------------------------------
جوه العيون أطفال فرح لمة زفاف ...
جوه العيون تشرق شموس يرحل جفاف ..
أزمان بتغرق في النعيم ..
وحنان غمر عاشقين رهاف ...
وأنا جوه قلبي المشتهيك ..
نزفت جراحات الودار ...

---------------------------
يا زهرة طلت بالفرح ..
بتراقص أنوار المسا ...
ما بان عليك أثر القطاف ..
ولا جاتك أيام القسا ..
ما أروعك وإنتي الشباب ...
بي حمرة الريد إكتسى ...


104 / صرخة


مردودة من صرخة وصدى ..
مولودة في الزمن العقيم ..
رغم المسافة .. الدهشة ...
والشوق والندم ...
أدمنت تحديق السراب ..
هدمت في ليل الحزن ..
أوغلت في الزمن الغياب ..
أدمنت فيك عشق الحروف ...
رغم إنهزامي مع الظروف ..

-------------------------
لا المدرات المسافر فيها لعيونك مداي ..
لا هواك كان مبتداي .. لا مداك كان منتهاي ..
كنت فارد للحلم في ليل رحيل مليون جناح
كنت فاتح صدري ديمة ..
وما بخاف في الزمن الخرافي ..
ودمي كان باقي المداد ...
نبضي في حزن القوافي ..
وصبري في الليل الودار ..
وديمة أنسج في الغناوي ..
والتواشيح القديمة ..
أعشق الأمل البعاين ..
في المسافات الأليمة ..
تسخر أقداري العنيدة ...
وتبكي أحزانها القصيدة ...
لا زفافك كان مطاف .. للأماني وللعفاف ..
وخاصمت عيني الغمامة ..
وداس فرح عمري الجفاف ...



105 / سفر السكوت

طوبى للرجال العصافير
كلما حطّ طائرهم فوق غصن
غنوا بشجيى الكلام .. بديع الصور
وبؤساً لنا نحن الرجال .. الشجر
كلما جرفتنا شجون المنافى
تهاوت جذور الكلام
جفت ينابيعنا
وأرهقتنا ليالى السفر
تؤرقنا الذكرى
توقِد نار المواجد فينا
فيوجعنا الشوق فى صرة القلب
يتأبى حتى السكون الذليل
نخرج الآن من جلدنا
ونخدش صمت السؤالات
نركض عبر الطريق الطويل
من أى ثقبٍ فى الحكايات جئنا
ومن أى بابٍ فى السماواتِ ..
كان إلتماس السكينة؟
ومن أى ذنبٍ عصىٍ
تعلم القلب سفر الرحيل
الطيور قطعت رحلتها ثم عادت
والأمانى إستكانت
والليالى ما عاد صمتها مستحيل
والنساء اللائى علمننا
العشق فى زمانات النداء الجميل
نسجن كعادتهن من
كذوب الروايات
ما يخلع الدفء عن جسد الحب
ثم تذوقن للحبيب البديل
يا صديق المسافات أركض
ما عاد فى الحزن متسع
لصفير الجراحات - قلبى وقلبك-
ولا صبر فى الأفق لإنتظار الخيول
كل المراكب تاهت
أنكرتنا الشموس
والحبيبات خانت
لفظتنا البحار
فهل يستطيع البنفسج
أن يكون الكفيل ؟
أيوجعك الوصف ؟
آه .. من زمنٍ كنا
ننتقى فيه العبارات
من فصوص المحار
نتمشى فى مفاصل الشعر
تأخذنا كل ساعةٍ فى مدار
آه .. من آه .. ثم آه
من كل ذاك الزمان النبيل
أصرخ الآن .. أو
أخرج الآن .. أو
إنزف الآن .. أو
أكتم الشدو فى الفؤاد العليل


105/ بيت ألأشباح


بين سجن وبيت اشباح

وعطالة ودم مباح

ومزلة تودى الغربة

والغربة جراحة جراح

والحل فى بلدك زاتة

تتحدى سلاح بسلاح

تهزم خفاش العتمة

ويغسل سودانا صباح

الخمج الماحق سوقنا

من بعض وفا المحتاج

والعبرة الرابطة حلوقنا

من فيض كاس الدجال

الوهم الداير يسوقنا

اصبح مفضوح الحال

ما فضل الا مروقنا

وبسلاحنا نعدل الحال

بسلاحنا نعدل المال

يا غضبة نيلنا الطامح

وكتين يكسح طوفان

يا سيل الشعب الجامح

فى الثورة بعد عصيان

يا ضراع الولد الجارح

بسلاحك فى المليان

الكى للالم الناتح

والعبرة لكل غبيان

--------------------------------------------------------------------------------


106- عجاج البحر


يراقصنى عجاج البحر
ترعد داخلى الأمطار
يكلمنى تراب الأرض
يشدد قلبى الأوتار

أغنيكم ... أغنيكم

أغنى جذوة النار التى فيكم
وألعن ذلك البرد المدثر
روحكم برماد موتاكم

أغنيكم ... أغنيكم

وأبنى فى عيون الشمس
مملكتى تناديكم
نسوراً تعشق الترحال
فى الآفاق تبغى الكون حرية

فإن شئتم

تعالوا الآن نرقص رقصة البدء

ونعلم أن نمد الكف
نحو الشمس بالدفء

تعالوا أيها الجوعى
تعالوا أيها الفقراء

107/ عباد الشمس